City Smash Review

Napaisip ng Paradyme Games ang mga manlalaro kung ano ang mangyayari kung maghagis sila ng bomba na maglalabas ng black hole sa isang silid gamit ang kanilang larong Room Smash. Masasagot nito ang iyong katanungan dahil tinutularan nito ang physics sa totoong buhay at ipinapakita ang mga posibilidad kung gagamit ka ng mga bomba at iba pang weapon sa silid. Sa isa pa nilang larong Solar Smash, ang mundo ay ang iyong laruan. Maaari kang mag-eksperimento sa Earth sa pamamagitan ng paggamit ng mga missile o kalamidad, at dapat layuan ka ng mga tao kung natutuwa kang gawin ito sa totoong buhay. Ang City Smash ay isa sa kanilang simulation game na katulad ng mga nabanggit na laro, ngunit ito ay limitado lamang sa mga lungsod.

Dahil ito ay isang simulation game, wala itong anumang layunin kundi ang gayahin ang isang sitwasyon kung gagamitin mo ang lahat ng mga sakuna sa isang lungsod. Wasakin at durugin ang lahat ng mga gusali gamit ang mga weapon, magtawag ng mga bagyo, o kahit na mga halimaw. Tingnan ang lahat ng mga posibilidad sa iba’t ibang lugar at baguhin ang land formation ayon sa gusto mo.

Ipinapakita ng mga button sa kanang bahagi ng iyong screen ang lahat ng mga sakuna na magagamit mo upang magdulot ng kalamidad sa iyong lungsod. Kailangan mo lang i-tap ang screen para ipatawag sila at panoorin ang buong lugar na nasusunog habang gagawin ng mga sakuna ang kanilang trabaho. Minsan, makokontrol mo ito sa pamamagitan ng pag-click sa button o paggamit ng D-pad na lalabas sa screen. Kung gusto mong palitan ang lungsod, i-tap ang button sa iyong ibabang kaliwang screen at piliin ang lokasyong gusto mong i-obliterate. Ang pag-click sa button na may icon ng mata ay mag-aalis ng lahat ng mga menu sa iyong screen upang bigyan ka ng buong view ng lungsod na nilipol.

Features ng City Smash 

Mga Achievement – Ang mga gawaing magagawa mo sa laro, at makakatanggap ka ng mga XP sa tuwing makukumpleto mo ang mga ito. Ang mga ito ay tungkol sa paggamit ng isang tiyak na halaga ng mga weapon o pagbaril sa isang aircraft.

Weapon – Wasakin ang mga lungsod gamit ang mga ito. Ang bawat isa ay may iba’t ibang mga tema, at maaari mong i-adjust kung gaano kalakas ang kanilang pinsala.

Mga Lungsod – Ito ang mga lugar na maaari mong alisin, at ang lahat ng mga istruktura ay idinisenyo upang maging marupok. Kapag nawasak ang mga ito, magre-react ang mga debris sa mga pagsabog, black hole, magnetism, o anumang mga weapon na iyong ginagamit.

Atmosphere – Ito ay nagbibigay-daan sa iyo upang i-customize ang background ng lugar at ang panahon. Ang mga pagpipilian ay mga bundok, lungsod, kapatagan, at burol. Maaari ka ring magpa-ulan o magpa-niyebe para magdagdag ng dramatic effect. Kung ayaw mo naman, maaari mo itong i-off.

Saan pwedeng i-download ang City Smash?

Pumunta sa Google Play Store gamit ang iyong smartphone kung Android user ka o sa App Store kung iOS user naman, at ilagay ang City Smash sa search bar. Dahil libre ang laro, i-click at i-install ito at hintaying mai-download ito.

Narito ang mga link kung saan mo maaaring ma-download ang laro:

Download City Smash on Android https://play.google.com/store/apps/details?id=com.paradyme.citysmash

Download City Smash on iOS https://apps.apple.com/us/app/city-smash/id1473705776

Download City Smash on PC https://www.bluestacks.com/apps/simulation/city-smash-on-pc.html

Kung nais mong laruin ito sa PC, i-download muna ang BlueStacks emulator mula sa kanilang https://www.bluestacks.com. Kompletuhin ang access na kinakailangan sa Google Play at mag-sign in gamit ang iyong account, at pwede mo nang i-download ang laro at maranasan ito sa PC.

Guide para sa mga weapon 

Hindi na kailangang malito tungkol sa kung ano ang ginagawa ng mga weapon dahil gagabayan ka ng Laro Reviews kung paano sila gamitin.

Mga Explosive

Naglalaman ito ng lahat ng bomba, kaya hinaan ang iyong volume kapag may suot kang earphone.

• Mga Firework – Hindi ito nakakapinsala tulad ng iba. Magpapakita lamang ito ng fireworks display kapag na-click mo ang iyong screen.
• Atomic Bomb – Ang pinaka-mapaminsala sa kanilang lahat. Aalisin nito ang lahat pagkatapos nitong kumislap ng nakakasilaw na liwanag.
• Ballistic Missile – Ang weapon na ito ay maghuhulog ng missile sa lugar kung saan mo i-tap ang screen. Ang mga pagsabog ay hindi magtatagal, at sila ay magiging mas mahina kaysa sa iba.
• Mga remote-controlled na bomba – Ang mga ito ay inilalagay sa mga istruktura, at sila ay sasabog lamang kapag pinindot mo ang pulang button sa iyong screen.
• Cluster Bombs – Magbaba ito ng isang bomba na sasabog sa isang mas maliit na granada na magdudulot ng malaking pinsala.

Mga Natural na Kalamidad

Kung napanood mo na ang pelikulang 2012, magiging pamilyar ka sa lahat ng ito.

• Bulkan – Ang paggamit nito ay magpapalabas ng bulkan mula sa lupa at sasabog. Maghahagis ito ng nagliliyab na mga bato na sisira at susunugin ang anumang bagay.
• Tsunami – Magpapalabas ito ng napakalaking tidal wave. Wawalisin nito ang anumang bagay sa daan, kabilang ang apoy.
• Lindol – Ito ay magpapayanig sa lupa na magiging sanhi ng pagbagsak ng matataas na gusali.
• Tornado – Naglalabas ng mapanirang buhawi na dudurog sa lahat ng bagay.
• Hangin – Ito ay maaaring kalmado, ngunit ang isang malakas na bugso ng hangin ay magpapatumba sa anumang bagay na nakatayo.
• Thunderstorm – Mararanasan mo kung ano ang pakiramdam na maging isang Greek god na nakatira sa Olympus habang naghahagis ka ng mga kulog sa pamamagitan ng pag-tap sa iyong screen.

Cosmic Occurrences

Anumang phenomena sa outer space ay maaari na ngayong mangyari sa lungsod dahil sa mga weapon na ito.

• Bombed Implosions – Ito ay magtitipon ng lahat sa isang lugar at magpapalabas ng isang malakas na pagsabog.
• Magnet – Ito ay self-explanatory. Ang lahat ng mga metal ay maaakit sa kung saan mo i-tap ang screen.
• Mga Portal – Naglalabas ng dalawang portal sa iyong lungsod. Ito ay sasabog sa unang pagkakataon na ilagay mo ito. Anumang bagay na pumapasok sa portal ay lalabas sa isa pa.
• Laser Ray – Sumasabog ang isang malakas na laser na nag-aalis ng anumang bagay. Ito ay magiging mas malakas kapag mas matagal mong pinindot ang screen.
• Meteor – Isang higanteng bulalakaw ang babagsak mula sa langit at masisira ang lupa.
• Black Hole – Lumilikha ng black hole na hihigop sa lahat ng malapit dito papunta sa oblivion.

Kaijus

Ito ang mga dambuhalang halimaw na maaari mong tawagan upang magdulot ng kaguluhan sa mga mapayapang lungsod.

• Sandworms – Ang mga ito ay hango sa nobelang Dune. Isang higanteng uod ang lalabas sa lupa at magpapakawala ng nakakabinging tili. Babalik ito sa lupa habang umaalis sa isang butas.
• Godzilla – Ang sikat na higanteng halimaw ay nagmula sa mga Japanese film. Ang bawat mabigat na hakbang ay nagiging sanhi ng pagyanig ng lupa, at ito ay titigil lamang para magpasabog ng laser mula sa bibig nito.
• Eldritch Tentacles – Tumingin ka sa langit. Ibon ba ito? Ito ba ay isang eroplano? Hindi, ito ay isang higanteng galamay na lumalabas mula sa isang rift sa space. Gayunpaman, maaaring hindi ito magdala ng maraming pinsala.

Airship at Alien

Gayahin ang mga eksena mula sa mga SciFi movie gamit ang mga weapon na ito.

• Extraterrestrial Spacecraft – Ito ay isang U.F.O na maaari mong kontrolin. Maaari itong magpasabog ng laser ray o higupin ang lahat ng bagay.
• U.F.O. Bomber – Ipapatawag nito ang isang alien spacecraft na magbabagsak ng bomba.
• Aerial Attack – Isang aircraft ang lilipad sa ibabaw ng isang lungsod habang naghuhulog ng mga bomba na magdudulot ng malaking pagkawasak.
• Low-flying Aircraft – Ang isang Jetfighter ay magga-glide pababa at babarilin ang target nito gamit ang isang machine gun.

Pros at Cons ng City Smash 

Ang laro ay may high-quality graphics at animation. Kung hindi ito makayanan ng iyong phone, maaari mong ibaba ito. Nakakabahala na marinig ito sa totoong mundo, ngunit relaxing panoorin ang ang mga gusaling nasusunog at gumuguho. Maaaliw ka sa loob ng maraming oras habang sinisira mo ang lahat.

Dahil sa simulation ang genre ng larong ito, wala kang anumang mga dapat i-grind na resources. Magagamit mo ang lahat ng features nito ng libre at wala kang dapat na panooring mga ad upang magamit ang mga uri ng kalamidad dito. Gayunpaman, maaari ka pa ring magsawa sa paglalaro nito dahil premise lang ng larong ito ay ipakita ang mga possibleng mangyari kung maganap ang isang sakuna. Dahil dito maaari mo itong pagsawaan kung nasubukan mo na ang lahat ng kalamidad o weapon sa lahat ng mga lugar.

Malalaro mo ito kahit wala kang stable na internet connection kaya hindi mo kailangang problemahin ang lag sa paglalaro. Walang bug na natagpuan dito, at naging maayos ang gameplay sa laro. Gayunpaman, mas mabuti kung magdagdag sila ng higit pang mga lungsod at weapon sa kanilang susunod na update. Maaari nilang idagdag ang mga sikat na landmark sa mundo tulad ng leaning tower of pisa mula sa Italy.

Konklusyon

Ang City Smash ay isang kakaiba at nakakaaliw na simulation game. Maipapakita nito ang mga posibilidad kung may mangyayaring sakuna sa lungsod. Nakakaaliw din panoorin ang malalakas na pagsabog o gumamit ng mga weapon para mawasak ang lugar. Inirerekomenda ito ng Laro Reviews sa mga manlalarong gustong sirain ang mga bagay sa isang simulation game.