Guardian Chronicles Review

Ang Guardian Chronicles ay isang strategy game mula sa LINE Games Corporation, isang South Korean Android game developer. Simula ng ito ay inilabas sa Google Play Store noong Marso 25, 2021, ito ay nakakuha ng maraming positibong feedback mula sa mga manlalaro sa buong mundo.

 Ang pangunahing layunin ng mga manlalaro rito ay talunin ang kalaban at patayin ang mga monster upang maprotektahan ang base mula sa pagkawasak. Kahit magkaiba ang mechanics ng bawat game mode ng larong ito, ang layunin ay pareho pa rin. Itinatampok din nito ang Guardians at Masters na may iba’t ibang skills at magic abilities na maaaring i-summon at i-upgrade upang labanan ang mga kaaway at makamit ang mga layunin sa laro.

Paano I-download ang Laro?

Para ma-enjoy ang Guardian Chronicles, kailangan mong i-download ang app sa kahit anong iOS o Android device. Kung nais mo namang laruin ito sa iyong laptop o desktop, kailangan mong gumamit ng isang Android emulator upang mai-download ito sa computer. Para hindi ka na mahirapan pa, maaari mong gamitin ang mga sumusunod na link:

Download Guardian Chronicles on iOS https://apps.apple.com/au/app/guardian-chronicle/id1522856980

Download Guardian Chronicles on Android https://play.google.com/store/apps/details?id=com.linegames.gc

Download Guardian Chronicles on PC https://www.bluestacks.com/apps/strategy/guardian-chronicle-on-pc.html

Guardian Chronicles: Ultimate Guide para sa mga Manlalaro

Tandaan na kahit pwede kang maglaro bilang isang guest, mas mabuti pa ring magkaroon ka ng game account upang hindi mawala ang iyong game data at progress. Hindi naman mahirap gumawa ng account dito. Ang tanging kailangan mong gawin ay i-link ang iyong Facebook, Google o Apple account sa laro. Handa ka na bang subukan ang larong ito? Bago ang lahat, tatalakayin muna natin ang mga bagay na kailangan mong malaman. 

Ang Guardian Chronicles ay may malaking pagkakatulad sa mga karaniwang tower defense game. Ang isang pagkakaiba lang ay ang konsepto nito. Ito kasi ay hango sa fantasy-steampunk anime theme. Kung mahilig ka sa strategy games, malamang alam mo na kailangan mong laruin ito ng madalas para mabilis kang makapag-level up. Isa sa mga natatanging tampok ng larong ito ay ang in-game reward system na nagre-reset pagkatapos ng ilang oras. Kung handa kang sumabak sa hamon nito, ang artikulong ito mula sa Laro Reviews ay magsisilbing gabay mo para malaman ang mahahalagang bagay tungkol sa laro. 

Ang game mechanics ng Guardian Chronicles ay simple lang. Kailangan mong mangolekta ng guardians at master at i-upgrade ang mga ito upang makipaglaban sa mga kaaway at maipagtanggol ang iyong base. Nagtatampok ito real-time, competitive, at cooperative na defense play sa pamamagitan ng isang war board. Kailangan mong ilagay dito ang iyong master at limang guardians upang maatake nila ang mga monster.

• PVP Competitive Mode vs Co-op Mode

May dalawang paraan para ma-enjoy ang labanan sa larong ito. Ang una ay sa pamamagitan ng PVP Competitive Mode at ang pangalawa ay sa pamamagitan ng Co-op Mode. Sa PVP Competitive Mode, makakatapat mo ang isa pang manlalaro. May mga monster na biglang lilitaw sa board at ang mga ito ay aatakihin ng iyong guardians. Ang lahat ng mga monster na mapapatay mo ay maililipat sa board ng kalaban upang doon ulit maminsala. Ganito rin ang mangyayari sa monsters na mapapatay ng iyong kalaban. Upang manalo, kailangan mong mag-survive ng mas matagal kaysa sa iyong kalaban. Tandaan na ang maximum completion rewards sa game mode na ito ay hanggang 20 lamang bawat araw. 

Related Posts:

Booblyc TD Survival – Realm Tower Defense Review

Empire Defense TD Offline Game Review

Kailangan mo namang makipagtulungan sa isa pang manlalaro sa pakikipaglaban sa mga monster sa Co-op Mode. Hangga’t maaari, kailangan ninyong mag-survive hanggang sa matapos ang lahat ng round. Talagang kapanapanabik ito dahil pwede kang makipag-team up sa iyong mga kaibigan o kakilala. Para magawa ito, kailangan mo lamang magpadala ng paanyaya sa pamamagitan ng pag-click sa Invite Friend button. Ang mode na ito ay binubuo ng 40 rounds kaya kailangan mong siguraduhin na walang monster na makakalampas sa’yo. 

• Paano Bumuo ng Deck?

Tulad ng nabanggit kanina, kailangan mong gumamit ng limang guardians at isang master para makabuo ng deck. Ang guardians ang aktwal na aatake sa mga monster. Pwede mong pagsamahin ang dalawang guardians upang makabuo ng isang mas malakas na uri. May apat na kategorya ang mga guardian sa laro depende sa kanilang abilidad at kakayahan: defense, support, attack at growth. 

Sa kabilang banda, ang master naman ay nagsisilbing synergy sa iyong deck. Mas pinapalakas at pinapatibay nila ang mga guardian. Kailangan mong pumili ng mga guardian na akma sa espesyal na kakayahan ng iyong master. Ugaling basahin ang kanilang description at stats upang malaman kung paano sila dapat gamitin. 

• Maps

Ang Guardian Chronicles ay nagtatampok ng maps na may iba’t ibang uri ng terrains. Ang mga ito ay idinesenyo upang subukan ang kakayahan ng mga manlalarong gumawa ng diskarte ayon sa iba’t ibang sitwasyon. 

•  Lanic

Ang Lanic ay nagsisilbing mana o pangunahing resources sa larong ito. Ito ay ginagamit para makapaglagay ng guardians sa war board. Ang kabuuang halaga ng iyong Lanic ay patuloy na nadaragdagan tuwing ikaw ay nakikipaglaban.

Pros at Cons ng Guardian Chronicles

Ang Guardian Chronicles ay isang exciting at mapanghamong strategy game. Ang graphics at animations nito ay may magandang kalidad at isa ito sa mga dahilan kung bakit marami ang nahuhumaling dito. Maraming mapagpipiliang guardians sa laro at ang kanilang character design ay talagang nauuso at nakakabighani. Hindi tulad ng karamihan sa tower defense games, wala itong pay-to-win scheme. Ang paglevel-up sa laro ay talagang nakasalalay sa diskarte at abilidad ng isang manlalaro at hindi sa kakayahang gumastos para sa in-app purchases. 

Bukod sa mga nabanggit sa itaas, may hindi maganda at nakakadismayang aspeto rin ang larong ito. Maraming manlalaro ang naiirita dahil may mga pagkakataong naiistorbo ang kanilang paglalaro dahil bigla itong nagka-crash at nagfi-freeze. Nakalulungkot mang isipin ngunit ang matchmaking system nito ay tila hindi patas dahil ang mga baguhang manlalaro ay madalas na naitatapat sa mga manlalarong may mas mataas na level. 

Konklusyon

Ang Guardian Chronicles ay nagbibigay ng kakaibang gaming experience sa karamihan. Sa kasalukuyan, mayroon itong 3.9-star rating mula sa mahigit sa 12,000 reviews sa Play Store. Sa kabilang banda, mas mataas naman ang rating nito sa App Store na 4.5 stars mula sa 27 reviews. Para sa Laro Reviews, ito ay sulit namang laruin lalo na kung naghahanap ka ng isang larong may progresibong gameplay at pwede mong pagkaabalahan sa iyong libreng oras. Tiyak na masisiyahan ka rito dahil ito ay nakakaaliw at kapanapanabik. Subalit, kung ikaw ang tipong madaling magsawa sa mga paulit-ulit na aktibidad, ang Guardian Chronicles ay maaaring hindi para sa iyo.

Laro Reviews