Magic Seasons: Farm and Build Review

Halina’t sumabak sa isang mahiwagang gaming adventure sa Magic Seasons: Farm and Build. Ang single-player game na ito ay inilunsad ng Stark Games LLC noong Nobyembre 22, 2021. Sulitin at maglibang sa iyong libreng oras habang ginagalugad ang malawak na lupain na puno ng mahika at pantasya. Sa larong ito, may pagkakataon kang palawakin at paunlarin ang iyong nasasakupan.

 

Ang pangunahing layunin ng mga manlalaro rito ay ayusin at pagandahin muli ang napabayaang lupain. Upang magawa ito, kailangan nilang mag-level up sa laro sa pamamagitan ng pagpuno ng mga sako ng candies sa tulong ng elves. Kinakailangan din nilang tuparin ang iba’t ibang tasks upang makakuha ng rewards at gifts, at mas mapaunlad pa ang bayan.

Paano I-download ang Laro?

Ang larong ito ay pwedeng i-download ng libre sa Play Store at sa App Store. Maaari itong i-download sa mga Android at iOS device. Maaari mo ring laruin ito sa laptop o desktop sa pamamagitan ng pag-download ng APK file ng app at pag-run nito gamit ang isang lehitimong emulator. Kung nagmamadali ka at nais mong i-download ito kaagad, i-click lamang ang mga sumusunod na link: 

Download Magic Seasons: Farm and Build on Android https://play.google.com/store/apps/details?id=stark.games.magic.seasons2022.farm.build

Download Magic Seasons: Farm and Build on iOS https://apps.apple.com/us/app/magic-seasons-farm-and-build/id1587892675

Download Magic Seasons: Farm and Build on PC https://pcmac.download/app/1587892675/magic-seasons-jogo-de-fazenda

Ultimate Guide para sa mga nagsisimula

Sa pamamagitan ng Seasons: Farm and Build, maaari mong maranasan kung papaano maging bahagi ng isang mundong puno ng hiwaga at magic. Subalit, bago mo simulan ang iyong kapanapanabik na adventure, hayaan mong tulungan ka ng Laro Reviews na malaman ang mahahalagang bagay tungkol sa laro. Huwag kaligtaang i-click ang settings icon sa kanang-itaas na sulok ng iyong gaming screen at i-link ang iyong Facebook o Google Play account. 

• Gameplay

Para makapag-level up sa larong ito, kailangan mong patuloy na paunlarin ang iyong bayan sa pamamagitan ng paglalaro sa magic factory upang makakuha ng rewards at resources. Ang unang bagay na kailangan mong gawin ay linisin ang buong lupain gamit ang magic wands. Ang hakbang na ito ay makakatulong upang malinaw mong makita ang kabuuan ng iyong magiging bayan. Para magawa ito, i-click ang Tools Section na matatagpuan sa kaliwang-ibabang sulok ng iyong gaming screen at pagkatapos ay i-long press ang wand icon. Pagkatapos nito, kinakailangan mo ring i-set up ang mga pailaw sa pamamagitan ng pag-tap sa wand nang paulit-ulit hanggang sa mapuno ang star meter. 

• Rewards at Resources

Sa tuwing mapagtagumpayan mo ang mga hamon sa bawat stage, makakakuha ka ng rewards at iba’t ibang uri ng gifts. I-click ang Gift icon at i-tap ang Redeem option upang makuha ang shiny, special o fairytale gift na iyong napanalunan. Ang magic wands na iyong makokolekta ay ginagamit sa pagtupad ng tasks. Kailangan mong gamitin ang mga ito ng mabuti sapagkat napakadali nitong maubos ngunit napakahirap namang makuha. Dapat kang maglaro sa regular game mode sa pamamagitan ng pag-click ng play button sa kanang-ibabang bahagi ng iyong gaming screen. Sa bahaging ito, kinakailangan mo ng tulong mula sa elves upang mapuno ang mga sako ng candies. Maaari mo silang i-summon gamit ang mga tsokolate. Habang napupuno ang mga sako, makakakuha ka rin ng karagdagang tsokolate na maaari mong gamitin upang madagdagan ang elves kapag kinakailangan. Ang bawat game stages ay nahahati sa batches na dapat mong malampasan. 

• Game Features at Elves

Maaari mo ring gamitin ang iyong imahinasyon upang gumawa ng mga kakaibang laruan dito. Pwede ka ring mag-alaga at mag-train ng isang griffin upang makakuha pa ng mas maraming rewards. May interactive features din ang larong ito dahil pwede kang mag-enjoy kasama ng iyong mga kaibigan o kaya ay makipag-ugnayan sa ibang manlalaro mula sa iba’t ibang panig ng mundo.

May mini-games din ditong pwedeng gawing extrang libangan. Maaari kang lumahok sa mga ito upang makakuha ng karagdagang resources. Huwag mo ring kalimutan na i-check at kumpletuhin ang Daily Quests para makaipon ng rewards at mapabilis ang iyong pag-level up. Huwag mo ring papalampasin na subukan ang iyong swerte sa Roulette. Malay mo, pumanig sa’yo ang kapalaran at manalo ka rito ng limpak-limpak na game rewards. 

Napakahalaga ng papel na ginagampanan ng worker eleves upang mapanatiling gumagana ng maayos ang iyong magic factory. Ang mga ito ay may iba’t ibang uri at ranks ayon sa kanilang stats tulad ng speed at efficiency level. Kapag mas mataas ang kanilang stats, mas napapadali ang pagtapos ng mga gawain. Maaari mong pagsamahin ang dalawang magkaparehong elves na magkasing-rank upang makabuo ng upgraded version nito. Sa paraang ito, magiging mas mabilis ang paggawa at marami pa silang mapupuno na mga sako ng candies. 

Pros at Cons ng Magic Seasons: Farm and Build

Ang larong ito ay may makulay at nakakaaliw na graphics na talaga namang nakalulugod tingnan. Ang animations na ginamit dito ay mahusay at de-kalidad din. Mayroon itong simple, madaling matutunan at nakakahumaling na gameplay. Ang sound effects at background music na tampok dito ay talagang kapansin-pansin dahil nagiging mas nakakatuwa at mas mahiwaga ang dating ng laro. 

Gayunpaman, maraming problema at isyu ang natukoy ng mga manlalaro rito. Ang isa sa mga nakakadismayang bagay tungkol dito ay ang pabalik-balik na technical issues na nagiging dahilan kung bakit may mga pagkakataong napakahirap nitong laruin. Ang app ay medyo laggy at napakabagal pang mag-load. Maraming beses ding nangyaring biglaan na lamang itong nagka-crash at nagfi-freeze sa hindi malamang dahilan. Halos ang lahat ay nagrereklamo dahil napakahirap makakuha ng sapat na halaga ng coins at resources sa larong ito. May mga nagsasabi na isa ito sa mga paraan upang mapilitang gumamit ang mga manlalaro ng in-app purchases. Ang messaging system nito ay hindi rin gumagana ng maayos dahil ang game invites ay hindi naisi-send kahit pa tama naman ang inilalagay na email address. Ang gameplay nito ay masyadong simple at marami ang hindi ito nagugustuhan. Sa katagalan kasi ay nagiging boring ito at paulit-ulit na lang. Gayundin, hindi epektibo ang interactive features nito dahil walang translation sa laro upang magkaintindihan ang mga manlalarong magkakaiba ang lenggwahe.

Konklusyon

Sa kasalukuyan, walang pang available na ratings at reviews ang larong ito sa Play Store. Subalit, ito ay nakapagtala na ng mahigit sa 100,000 downloads. Samantala, mayroon naman itong average rating na 4.4 stars mula sa 33 reviews sa App Store. Para sa Laro Reviews, ang larong ito ay nakakadismaya. Kahit kasi kahanga-hanga ang graphics at effects nito, ang gameplay at features naman nito ay nakakabagot at pangkaraniwan lang.