Mythic Heroes: Idle RPG Review

Ang paglalaro ay dapat na maging masaya at therapeutic. Galing ka sa nakakapagod na araw, at ang gusto mo lang gawin ay laruin ang iyong paboritong MOBA game. Nagpasya kang maglaro ng isang ranked game. Ngunit may nakasama kang ilang toxic players na patuloy na nang-aagaw ng kills at hindi nakikipagtulungan. Ang mga ganitong sitwasyon ang nag-aalis ng saya sa paglalaro. Buti na lang ay may mga idle game tulad ng Mythic Heroes: Idle RPG na isa sa pinakamahusay sa uri nito. Magpaalam sa iyong mga toxic teammate dahil maaari mong piliin ang komposisyon ng iyong koponan. Masyadong abala para mag-level up? Huwag mag-alala dahil may feature ang laro na nagbibigay ng reward sa mga manlalaro kahit na AFK sila.

Isa kang summoner at ginising ka ng Spirit of Astrolabe na pinangalanang Hecate. Binati ka niya sa iyong pagdating sa Ascension Realm at ipinakilala ka kay Baldur ng Asgard. Sinabi niya sa iyo ang paghihimagsik ni Lucifer at humingi ng tulong upang talunin siya. Magsisimula ang laro sa inyong pagpasok sa Infinity Tree. Sa larong ito, kailangan mong talunin ang iyong mga kaaway gamit ang mga karakter. Walang komplikadong mga kontrol ang laro dahil kusa silang aatake sa mga kalaban kapag na-click mo ang fight button. Ngunit maaari mong i-tap ang kanilang icon sa ibaba ng screen upang gamitin ang kanilang Ultimate at ipamalas ang kanilang mahusay na skills. 

Features ng Mythic Heroes: Idle RPG

Tinipon ng Mythic Heroes: Idle RPG ang mga hero mula sa iba’t ibang mga myth at alamat sa iba’t ibang bansa. Maaari ka ring maglaro tulad ng mga diyos at diyosa mula sa mitolohiyang Griyego, mitolohiyang Norse, at iba pang mythical creatures. Nahahati sila sa apat na factions. Una rito ay ang mga Luminarch na alyansa ng Elder Gods at ng Angel Covenants na nanumpang protektahan ang sagradong kaayusan ng mundo. Sa kabilang banda, ang mga Shadowarch ay tutol sa kanila at pinapaboran ang kaguluhan at pagkawasak ng lumang kaayusan. Ang Guardians naman ay mga taong may sapat na kapangyarihan upang makipagkumpitensya sa ibang mga faction. Gayundin, ang mga Verdian naman ay mga mythical creature na nakakukuha ng kapangyarihan mula sa kalikasan.

Ang Astrolabe of Truth ay isang mahiwagang device na nagbibigay ng mga reward kapag offline o AFK ang player. Depende ang dami ng mga materyales sa kung gaano katagal ka umalis sa laro. Makakatanggap ka ng Hero Shards, EXPs, mystery chest fragments, at marami pang iba. Sa kanang ibaba nito, maaari kang mangolekta ng Gears of Time at gamitin ang mga ito para mapabilis ang Astrolabe of Truth. Maaari mong mahanap ang Cubes of Truth sa kaliwang ibaba at i-unlock ang Cube Talents gamit ang mga cube fragment.

Matapos mong talunin si Lucifer, itinayo ninyong muli ang Sanctuary of Light at ginawa niyo itong kaharian. Ang unang lugar na na-unlock mo ay ang Summoner Sanctum. Maaari kang mag-summon ng mga hero sa pamamagitan ng iba’t ibang mga banner sa isang gacha system. Sa marketplace ay maaari kang bumili ng mga item gamit ang mga coin at gems. Maaari kang makipagkumpitensya sa iba pang mga manlalaro sa arena at sumali sa iba pang mga summoner sa guild.

Saan Pwedeng I-download ang Mythic Heroes: Idle RPG?

Pumunta sa Google Play gamit ang iyong smartphone kung ikaw ay Android user at sa App Store kung isa kang Apple user, at ilagay sa search bar ang Mythic Heroes: Idle RPG. Dahil libre lang ang laro, i-click ang install button at hintaying ma-download ang laro.

Narito ang mga link kung saan mo maaaring ma-download ang laro:

Download Mythic Heroes: Idle RPG on Android https://play.google.com/store/apps/details?id=com.igg.android.mythicheroes

Download Mythic Heroes: Idle RPG on iOS https://apps.apple.com/us/app/mythic-heroes-idle-rpg/id1580031550

Download Mythic Heroes: Idle RPG on PC https://www.bluestacks.com/apps/role-playing/mythic-heroes-idle-rpg-on-pc.html

Tips at Tricks sa Paglalaro

Makatatanggap ka ng napakaraming materyal tulad ng mga EXP, Hero fragment, at iba pang kapakipakinabang na mapagkukunan sa unang bahagi ng laro. Ang isang pagkakamali ng baguhan ay ang pag-upgrade ng mga maling hero na nagiging sanhi ng pagka-stuck sa level, kaya sundin ang mga gabay na itong mula sa Laro Reviews.

Nagkaroon ng maraming malalakas na heroes mula noong nag-update ang laro. Ngunit hindi mo kailangang i-summon silang lahat. Kung ikaw ay isang free-to-play player, kakailanganin mo ng maraming oras upang mangalap ng mga materyales upang mapakinabangan ang mga ito. Gumawa ng team batay sa mga angkop na composition at pagtuunan ang pagli-level up at pagpapalakas sa kanila. Oo, ang ilan sa kanila ay kaakit-akit at ang ilan nama’y may magandang voice acting. Ngunit hindi ito nangangahulugang maaari nilang i-carry ang iyong koponan. Pumili ng mga Hero hindi dahil sa kanilang itsura kundi batay sa skills at mga kakayahan tulad ng attack at defense.

Gayunpaman, hindi mo laging makukuha ang gusto mo at ma-summon ang isang hero na hindi mo kailangan ngunit maaari pa ring lumaban. Ayos lang na gamitin ang mga ito bilang kapalit para mapuno ang iyong koponan, lalo na sa early game. At kung naging mahina sila kahit na pinag-level up mo na, maaari mo silang i-reset. Gamitin ito para i-upgrade ang mas malalakas na heroes.

Pros at Cons ng Mythic Heroes: Idle RPG

Ang paborito kong bahagi ng laro ay ang Auto-Assault, dahil kusa kang ililipat sa susunod na level kapag natapos mo ang isang labanan. Dahil dito, maaari akong sumulong habang naka-AFK at gumagawa ng iba pang mas mahahalagang bagay. Kahit matalo ka, uulitin nito ang laban hanggang manalo. Ginawa ng gameplay na ito ang laro na mas nakaka-relax laruin, at ang Astrolabe of Truth ay nagbibigay ng mga libreng item kapag offline ka. Nagsikap din ang mga developer na gumawa ng magagandang sound effects at soundtrack na nagbibigay ng fantasy vibes. Nag-aalok ang laro ng maraming rewards para sa mga baguhan at mas maraming pagkakataong mag-summon ng mas maraming heroes. Hindi rin mahirap maka-ipon ng mga item dahil mayroon itong mga event at daily log-in rewards. Hindi ka nito pinipilit na gumastos ng totoong pera dahil maaari kang manalo sa mga laro tulad ng mga VIP player ang kaibahan lang ay mas marami silang perks kaysa sa mga free-to-play player.

Kung mas gusto mong maglaro ng RPG na nagbibigay-daan sa iyong kontrolin ang iyong mga character, maaari kang magsawa sa paglalaro nito dahil walang masyadong gagawin rito kundi panoorin silang makipaglaban. Dahil makakukuha ka ng mga hero sa pamamagitan ng gacha system, ibabase mo ang lahat sa chances. Kung hindi ka mapalad dito, maaaring hindi para sa iyo ang laro.

Konklusyon

Ang Mythic Heroes: Idle RPG ay nagbibigay-daan sa mga manlalarong umunlad ng hindi gumugugol ng napakaraming oras sa pagkontrol sa kanilang mga karakter. Maaari ka ring mag-grind para sa mga materyales habang natutulog. Mas madali ang gameplay nito kaysa sa mga kaswal na laro at hindi gaanong nakaka-stress kaysa sa iba pang mga MOBA game. Hindi mo kailangang mag-alalang maging kakampi ang mga toxic player at pilitin ang iyong sarili na mag-adjust para sa kanila dahil ikaw mismo ang magpapasya ng mga kasali sa iyong koponan. Maaari kang manalo sa pag-tap lamang ng iyong screen. Kaya’t kung naghahanap ka ng isang RPG game, ngunit kaunti lamang ang iyong oras upang mangalap ng resources, maaari mong i-download ito nang libre.

Laro Reviews