KawaiiWorld Review

KawaiiWorld – Isang napakahusay na application ang larong ito dahil tutulungan nito na mahubog at ilabas ang iyong talento sa pagiging malikhain. Bumuo at gumawa ng mga katedral, mansyon, tirahan, shopping mall, o anumang bagay mula sa mga cubic sandbox.

Hayaang gumana ang iyong isip at imahinasyon sa pagpapaganda ng iyong sariling mundo. Pinapabuti nito ang iyong kapasidad na mag-isip ng mga bagay sa makabagong paraan. Ang istilo, istraktura, at itsura ay naaayon lahat sa iyong kagustuhan. Ikaw ay malayang lumikha at mamuhay sa mundo ng KawaiiWorld.

Ano ang Layunin ng Laro?

Ang larong ito ay kapareho lang ng iba pang crafting game na available sa mga app store. Mayroon lamang silang dalawang layunin: lumikha at mag-explore. Ang tanging bagay na pangunahing ginagawa rito ay ang paglikha. Kakailanganin mo ang isang tool para makagawa ng mga bagay at ganoon din sa pag-atake sa iba pang mga nilalang. Mapapansin mo na lamang ang iyong sarili na nagsusumikap na mag-isip ng mga bagay na maaari mo pang magawa sa larong ito.

Kasunod nito ay ang pagtuklas sa iyong nagawang mundong. Tingnan mo ang resulta ng lahat ng iyong pinaghirapang buuin at subukan mong pagandahin ito kung may puwang pa para mas lalo pa itong maging kasiya-siya. Patuloy na galugarin ang paligid at kahit saan mo gusto dahil ito ang iyong mundo na walang limitasyon.

Paano Laruin?

May dalawang opsyon lang na lalabas sa iyong screen: Creative mode at Survival mode. Ibabahagi ng Laro Reviews ilang detalye tungkol sa mekaniks ng laro:

Creative mode – Dito walang mga misyon na kailangang gawin bukod sa walang humpay na paglikha at pagbuo. Ang iyong mga mapagkukunan ay walang limitasyon dahil lahat ng kagamitan ay makikita na sa iyong imbentaryo. Maaaring gumawa ng anumang bagay sa iyong crafting area. Walang mga kaaway o kalaban dito at walang magtatangkang sumugod o manakit sa iyo.

Survival mode – Magsisimula ka sa wala sa mode na ito. Walang mga mapagkukunan, at dapat pagsumikapan mong mabuhay kung nais mong manatili sa mundong ito. Mayroon ding mga kaaway na maaaring manakit sa iyo. Kaya kailangan mong mabilis na makahanap ng mga mapagkukunan upang makapagtayo ng bahay, makapag-strategize at makapagtago. Kailangan mo ring kumain para mabuhay dito. May mga nilalang o hayop na maaari mong kainin.

Paano I-download ang Laro?

Ang mga kinakailangan para matagumpay na ma-download ang KawaiiWorld sa Android devices ay dapat Android 4.1 o mas mataas pang bersyon ang gamit at ang makukuhang space ng app para sa Android ay 59 MB. Ito ay wala pang bersyon para sa iOS users.

• Download KawaiiWorld on Android https://play.google.com/store/apps/details?id=com.ua.vikos.world
• Download KawaiiWorld on PC https://www.memuplay.com/how-to-play-com.ua.vikos.world-on-pc.html

Hakbang sa Paggawa ng Account sa Larong KawaiiWorld

1. Hanapin ang anumang app store na makikita sa inyong mga device.
2. Hanapin ang bersyon ng larong KawaiiWorld, i-download at i-install ito.
3. Buksan ang app at i-connect ito sa iyong Google Play account.
4. Ang progress ng laro ay maiingatan o masi-save kung ili-link mo ito sa isang account.
5. Maaari mo na ngayong umpisahan ang paglalaro ng KawaiiWorld!

Tips at tricks sa Paglalaro ng KawaiiWorld

Walang gaanong tips at diskarte, lalo na sa Creative mode ng laro. Dahil walang limitasyon ang mga mapagkukunan at hindi mo kailangang mag-alala pagdating sa paghahanap ng mga materyales na kailangan mo. Malayang mabuhay, lumikha, at mag-explore rito. Walang mga layunin na dapat tapusin at hindi rin kailangang makipaglaban.

Sa Survival mode, mahihirapan ka dahil magsisimula ka sa wala. Wala kahit na isang sandata o tool na maaaring gagamitin. Dapat kang mabuhay araw-araw dahil may life bar na nagsasaad kung gaano katagal kang mabubuhay at isang food bar na nagpapahiwatig na dapat kang kumain, kung hindi ay mamamatay ka sa gutom. Kailangan mong balansehin ang life bar at food bar. Dapat kumain para mabuhay sa mode na ito at gumawa ng kahit maliit na hideout para makaligtas ka sa unang gabi ng laro dahil may mga kalaban na maaring umatake sa iyo. Mayroong mga gumagala na hayop na maaari mong huliin para maging pagkain mo. Iyan ang magiging pangunahing mga taktika; huwag magutom at gumawa ng isang taguan o labanan ang iyong mga kalaban at maging laging handa.

Related Posts:

Epic Seven Review

The Legend of Neverland Review

Pros at Cons sa Paglalaro ng KawaiiWorld

Ang KawaiiWorld ay isang kamangha-manghang adventure. Ito ay isang laro sa kompyuter kung saan ginagalugad ng mga manlalaro ang isang lugar at bumubuo ng mga istruktura at paglikha mula sa mga cubic sandbox. Naglalayon itong mapabuti ang iyong pagiging malikhain. Hindi lamang nito sinasanay ang mga manlalaro na matuto at makakuha ng impormasyon, ito rin ay nag-uudyok sa kanila na gamitin ang kanilang pananaw sa kakaibang paraan. Ito ay maaaring laruin ano man ang antas mo sa buhay at maging anumang edad.

Dito ay may kalayaang gamitin ang iyong talento ng walang pumipigil o magkokontrol sa kung paano mo gagawin ang isang bagay – lahat ay nakadepende sa iyong desisyon. Dapat mag-ipon ng mga materyales at magkaroon ng ideya kung ano ang naaangkop na gawin sa mga ito. Sa totoo lang, ang laro ay may kakayahang makatulong na diskubrehin ang potensyal ng isang tao. Pinahihintulutan ka nitong maging malikhain sa pamamagitan ng kalayaang ibinibigay nito na magpapalawak ng iyong imahinasyon. 

Ang negatibong reaksyon ng laro ay napakaraming lumilitaw na mga advertisement na nakakasagabal sa iyong paglalaro. Nagkakaroon din ng ilang mga error na mararanasan mo sa oras ng laro. Bukod doon, ang laro ay walang mga bagong update na may kaugnayan sa bagong feature na mag-aalok ng kagalakan sa mga manlalaro nito. Mas sasaya ang mga playesr nito kung makakaroon ng update at tuluyang maaayos ang mga problema sa laro. Kaya dapat itong matugunan kaagad. Mapapanatili rin ang interes ng mga naglalaro kung magdadagdag pa ng multiplayer mode sa laro.

Konklusyon

Sa kabuuang pagsusuri ng Laro Reviews, ang app na ito ay kapaki-pakinabang at naghahatid ng kakaibang aliw sa mga kabataan at pati na sa mga di-kabataan na sumubok maglaro. Hinahasa nito ang kakayahan ng mga manlalaro, lalo na ang mga batang nagsisimula pa lamang umusbong ang interes sa mga bagay-bagay. May mga isyu at problema na dapat solusyunan. Magiging maganda kung magdaragdag ng multiplayer mode para maaaring maisabay ang mga kaibigan sa paglalaro.

Laro Reviews