Lost Lands 4 Review

Ang Lost Lands 4 ay isang puzzle adventure game ng FIVE-BN GAMES. Ang ika-apat na yugto ng Lost Land series na may mga brain-teasing puzzle at mga hidden object. Kasama ang parehong pangunahing karakter, bisitahing muli ang parehong mahiwagang mundo habang nilulutas mo ang isang bagong problema.

Si Susan ay nabubuhay sa kanyang ordinaryong buhay pagkatapos ng kanyang pakikipagsapalaran sa Lost Lands. Hanggang sa dinalaw siya ng kaluluwa ni Captain Finuer Stulburn para humingi ng tulong sa kanya. Sa pagbabalik sa ibang lugar ng mahiwagang mundo, lutasin ang isa pang misteryo sa pamamagitan ng paghahanap ng mga nakatagong bagay. Bukod dito, gamitin ang iyong skills upang malutas ang mga puzzle at magpatuloy sa susunod na lugar.

Gugugulin mo ang karamihan ng iyong oras sa pag-tap at pag-drag sa mga item upang makipag-interact sa kanila. Ang icon sa iyong kanang ibaba ay may tatlong gamit depende sa kung anong button ang iyong ita-tap. Iisa-isahin ang mga ito ng Laro Reviews sa Features ng Lost Lands 4.

Features ng Lost Lands 4 

3D cinematic cutscenes – Ang mga eksenang nagpapakita ng kwento sa loob ng laro. Maa-activate ang mga ito kapag nakumpleto mo ang isang puzzle o nakipag-interact sa isang bagay. Bukod dito, maaari mong panooring muli ang mga ito sa extras tab.

Mini-games – Ang mga brain-teasing puzzle na susubok sa iyong spatial skills at pasensya. Bilang karagdagan, kailangan mo silang malutas upang umusad sa laro. Maaari mong laruing muli ang mga ito sa extras tab kapag natapos mo ang mga ito.

Puzzles – Naglalaman ito ng mga jigsaw puzzle na maaari mong lutasin. Ang bawat isa ay mula sa mga nakaraang eksena sa laro, at maaari mo lamang itong i-unlock kapag nakolekta mo ang mga kinakailangang item.

Collections – Ang mga karagdagang item na nakatago sa Lost Land. Hindi mo magagamit ang mga ito sa loob ng laro, at magagamit lamang ang mga ito kapag naipon mo ang kinakailangang dami. Halimbawa, ang pagkolekta ng walong Bottles of Rums ay magbubukas ng bonus puzzle. Ang mga item na maaari mong i-scavenge ay Mask, Morphing Objects, Sailboat Models, Fish statuettes, Skulls, Bottles of Rums, mga piraso ng mapa at manuscripts.

Journal – Isinusulat nito ang mga nakaraang pangyayaring naranasan ng iyong main character. Ito rin ay nagse-save ng mahahalagang impormasyong magagamit mo sa hinaharap

Hint – Nagbibigay ito sa iyo ng clue kung ano ang susunod na gagawin sa pamamagitan ng pagbilog sa isang bagay gamit ang magic gold dust. Bukod dito, ito ay matatagpuan sa kanang ibaba ng iyong screen sa ilalim ng compass.

Compass – Isang mahiwagang bagay na ibinigay ng kaluluwa ni Captain Finuer Stulburn. Ipakikita nito sa iyo ang mga lokasyon sa loob ng Lost Lands.

Saan pwedeng i-download ang Lost Lands 4?

Pumunta sa Google Play Store gamit ang iyong smartphone kung Android user ka o sa App Store kung iOS device naman. I-type ang Lost Lands 4 sa search bar. Dahil libre ang laro, i-click at i-install ito at hintaying matapos ang pagda-download.

Narito ang mga link kung saan mo maaaring ma-download ang laro:

Download Lost Lands 4 on Android https://play.google.com/store/apps/details?id=com.fivebn.ll4.f2p

Download Lost Lands 4 on iOS https://apps.apple.com/us/app/lost-lands-4-f2p/id1535452804

Gayunpaman, hindi mo ito malalaro sa iyong PC.

Tips at Tricks sa Paglalaro 

Normal na ma-stuck sa mga mystery game, ngunit hindi ibig sabihin ay titigil ka na at manonood na lamang ng mga walkthrough video sa Youtube. Gamitin ang mga tip na ito kung sa tingin mo ay hindi ka umuusad sa laro.

Mag-zoom in, mag-zoom out.

Nakatagong mabuti ang mga item sa laro. Maaari silang nasa loob ng mga ugat o sa ilalim ng mga buhangin. Ang ilan ay nasa labas ng kalye, ngunit hindi mo sila makikita sa unang tingin. I-zoom ang iyong screen para makakita ng mas magandang detalye at makita ang mga nakatagong bagay.

I-restart ang mini-games.

Minsan maliligaw ka at malilito kapag natigil ka sa paggawa ng parehong bagay. Halimbawa, halos isang oras mo nang tina-tap ang screen para malutas ang saw puzzle. Bago mo itapon ang iyong phone dahil sa galit, maaari mo itong iwanan at bumalik sa simula. Bibigyan ka nito ng ibang perspective upang malutas ang puzzle.

Panoorin ang mga ad.

Maaari mo lamang gamitin ang mga hint gamit ang coins, at mabibili mo ang mga ito gamit ang totoong pera. Maaari kang manood ng isang ad upang makuha ang mga ito kung ikaw ay isang free-to-play player.

Ito ay nasa journal.

Naghahanap ka ba ng mga simbolo para buksan ang bag? Nasa journal ito, kaya basahin ito sa tuwing makakatagpo ka ng naka-lock na bagay o pintong nangangailangan ng code para mabuksan ito.

Gamitin ang mga tool.

Kung hindi mo mabuksan ang isang bagay gamit ang iyong mga kamay, gumamit ng kutsilyo para putulin ito o martilyo para durugin ito. May dahilan kung bakit nananatili sila sa iyong inventory, kaya laging gamitin ang mga ito.

Pros at Cons ng Lost Lands 4 

Ang mga tutorial ay palaging bahagi ng karamihan sa mga laro upang ipakilala sa iyo ang mechanics nito, ngunit ito ay maaaring maging boring kapag hindi ginawa nang maayos. Gumawa ang mga developer ng mga malikhaing paraan para isama sila sa laro. Gagabayan ka ng mga ito habang umuusad ang kwento sa halip na bahain ka ng maraming impormasyon nang sabay-sabay. Nakakatulong ito sa mga manlalaro na matutunan kung paano kontrolin ang laro habang inaalam mo ang lore nito. Bukod dito, sinasabi nito sa iyo kung anong mga button ang gagamitin kapag na-stuck sa isang lugar. Halimbawa, nagpapakita ito ng mensahe upang i-click ang icon sa kanang ibaba ng screen upang bumalik.

Mayroong itong disenteng kwentong magpapanatiling interesado sa paglalaro. Ang laro ay nagpapakilala ng isang bagong bagay tulad ng mga character na makikilala o mga lugar upang tuklasin. Mas mag-i-invest ang mga manlalaro dahil curious sila sa susunod na mangyayari. Bukod dito, ang mga tala sa journal ay hindi lamang malaking tulong sa pagbibigay ng clue. Nagdaragdag din sila ng lalim sa kwento habang ipinakikita nila ang pananaw ng iyong pangunahing karakter.

Hindi mawawala ang mga puzzle sa mga misteryosong laro dahil hinahamon nito ang mga manlalarong gamitin ang kanilang mga kritikal na kasanayan sa pag-iisip sa paglutas ng mga ito. Gayunpaman, makatatagpo ka ng ilan sa mga itong susubok sa iyong pasensya. Hindi ito irerekomenda ng Laro Reviews sa iyo kung mabilis kang sumuko dahil ang mga puzzle nito ay hindi kasindali ng casual games.

Konklusyon

Sa balanseng dami ng lore at puzzle, masisiyahan ka sa paglalaro nito. Ang Lost Lands 4 ay may mga nakakaaliw na kwentong magpapasaya sa iyo sa katagalan. Gayunpaman, kakailanganin mo ng mahabang pasensya upang matapos ito dahil ang mga puzzle ay hindi kasindali ng iyong iniisip. Kung naghahanap ka ng isang mystery game na may fantasy theme, ito na ang iyong hinahanap. Maaari mo itong i-download nang libre, at available rin ito offline.